د وزیر لنډه پیژندنه - د کار، ټولنیزو چارو، شهیدانو او معلولینو وزارت

د وزیر لنډه پیژندنه

 ډاکتر نسرین اوریاخیل د زمان الدین لور، په ۱۳۴۳ هـ ش کال په کابل ولایت کې زیږیدلې، شپږ کلنه وه، چې مکتب یې پیل کړ، اوریاخیل خپلې لومړنۍ او  متوسط زده کړې له ۱۳۴۹ کال څخه تر ۱۳۵۷ کال پورې د محمود هوتکي په لېسه کې ترسره کړې او په ۱۳۶۰ هـ ش کال د رابعه بلخي عالي لېسې  څخه فارغه شوه، چې بیا د همدې کال په پای کې د کابل پوهنتون  طب پوهنځي کې شامله او په ۱۳۶۶ هـ ش کال د یاد پوهنځي څخه د لېسانس په درجه  فارغه شوه. 

 آغلې اوریاخیل په ۱۳۷۸ هـ ش کال په نسایي او ولادي څانګه کې خپل تخصص تر لاسه کړی، هغې له ۱۳۸۷ هـ ش کال څخه تر ۱۳۸۸ کال پورې د  فلوشیپ په څانګه کې ښوونیزه دوره هم پای ته و رسوله او د خپلو زده کړو په دوام او د طبابت له څانګې سره د زیاتې علاقې له مخې په ۱۳۹۱ کال د  پاکستان هیواد د مدیریت علومو له انیستیتوت څخه د عامې روغتیا په برخه کې د ماسترۍ سند هم تر لاسه کړ.

 ډاکتر نسرین اوریاخیل د خپلو لوړو زده کړو په جریان کې له ۱۳۷۷ هـ ش کال څخه تر ۱۳۹۰هـ ش کال پورې د هیواد په مختلفو، نا امنو سیمو او د  هیوادوالو سره په سختو شرایطو کې د متخصص ترینر په صفت په نسایي او ولادي څانګه کې خدمت کړی، نوموړې تر ۱۳۸۰ هـ ش کال  وروسته درې کاله د رابعه بلخي روغتونو مشري هم په غاړه  درلوده. 

 له طب سره مینه، پوهه او په دې برخه کې کافي تجربه هغه څه وو، چې آغلې اوریاخیل تل د روغتیا په څانګه کې خپل فعالیت ترسره کړی، همدا هڅې ددې باعث شوې، چې د وخت د چارواکو له خوا ډاکتر  نسرین اوریاخیل په ۱۳۸۷ هـ ش کال د ملالۍ روغتون د مشرې په توګه و ګمارل شوه، چې د کار، ټولنیزو چارو، شهیدانو او معلولینو وزارت د څوکۍ تر لاسه کولو پورې یې د یاد روغتون مشري او  مسؤلیت په غاړه درلوده.

 آغلې اوریاخیل په ۱۳۸۱ هـ ش کال د نسایي او ولادي ډاکترانو د ټولنې غړې شوه، یو کال وروسته یې (۱۳۸۲ هـ ش کال) د روغتیا په برخه کې د ښځو د پياوړي کولو ټولنې غړیتوب هم تر لاسه کړ،  نوموړې د نسایي او ولادي ډاکترانو ټولنې سره د ۵ کاله غړیتوب وروسته له ۱۳۸۶ هـ ش کال څخه تر ۱۳۹۳ هـ ش کال پورې د یادې ټولنې مشره و ټاکل شوه.

 د افغان کورنیو د تنظیمولو د لارښوونې ټولنې مشري، د ښځو شبکې غړیتوب،  د افغانستان د جراحانو ټولنې غړیتوب، د ټاکنو له لارې د سارک د غړو هیوادونو د استازو له خوا د کورنۍ د تنظیم د  منطقوي اجرائیوي کمیټې  (R E C) غړیتوب، هغه نور فعالیتونه دي، چې تر دا مهاله آغلې اوریاخیل د روغتیا په برخه کې ترسره کړي.

 آغلې اوریاخیل تر دا مهاله په داخل او بهر له هیواد څخه تر شلو زیاتو ښوونیزو پروګرامونو کې ګډون کړی، د بهرنیو سفرونو په لړ کې یې جاپان، هندوستان، نیپال، ایران، پاکستان، سریلانکا، بنګله  دیش، بوتان، تاجکستان، مالدیو، آلمان، هالند او امریکا متحده ایالاتو هیوادونو ته سفرونه کړي، چې د روغتیایي وضعیت د ښه کیدو په برخه کې یې ښې لاسته راوړنې درلودلې دي، چې له هغې جملې(  حمل خارج رحمي) تحقیقي کتاب، ولادي فیستولای کتاب، چې تر سموونې او چاپ لاندې ده، د حاملګۍ په اختلالاتو او د ولادتونو په شمېر باندې د مور او پلار د سواد د اغېز په اړه تحقیقي کتاب او د  نړیوال کانګریس د ولادي فیستولای په اړه د Abstract برابرول د یادولو وړ دي.

 په ټوله کې د آغلې اوریاخیل منظمې کړنې، لاسته راوړنې او منظم اقدامات هغه څه دي، چې له آغلې اوریاخیل څخه یې د روغتیا په برخه کې یو مشهوره څیره جوړه کړه، نوموړې په ۲۰۰۶ م کال د عامې  روغتیا وزارت، په ۲۰۱۳ م کال د ایران د نسایي او ولادي کانګرس، په ۲۰۱۴ م کال د ښځو چارو وزارت او په همدې کال د افغانستان د مدني ټولنو له خوا په ستاینلیکونو نازول شوې، نوموړې په  ۲۰۱۴ م کال د زړه ورې ښځې نړیواله جایزه هم و ګټله، چې دغه لاسته رواړنه یې نه نتها د روغتیا، بلکې په مختلفو برخو کې د ډاکتر نسرین اوریاخیل د ښه مدیریت او مشرۍ ښکارندویي کوي.